ໃນໄລຍະທີ 3, MRLG ສືບຕໍ່ໃຫ້ບຸລິມະສິດໃນການຮັບຮູ້ ແລະ ການປົກປ້ອງສິດຄອບຄອງຕາມປະເພນີຂອງຊຸມຊົນທ້ອງຖິ່ນ ແລະ ຊາວກະສິກອນຂະໜາດນ້ອຍໃນພາກພື້ນແມ່ນ້ຳຂອງ. ການເຮັດວຽກຢ່າງໃກ້ຊິດກັບບັນດາພາກສ່ວນກ່ຽວຂ້ອງທີ່ສໍາຄັນທັງລະດັບພາກພື້ນ ແລະ ລະດັບຊາດ, ລວມທັງບັນດາໜ່ວຍງານລັດຖະບານ ແລະ ອົງການຈັດຕັ້ງທາງສັງຄົມ, MRLG ໄດ້ສົມທົບກັບຄູ່ຮ່ວມຈັດຕັ້ງປະຕິບັດກ່ຽວກັບ ການຄອບຄອງຕາມປະເພນີໃນພາກພື້ນ (RCA) ເພື່ອຊຸກຍູ້ການຄົ້ນຄ້ວາ, ການສົ່ງເສີມ, ແລະ ການຈັດຕັ້ງປະຕິບັດບັນດາຂໍ້ແນະນໍາອາຊຽນກ່ຽວກັບການສິດຄອບຄອງຕາມປະເພນີ ທີ່ອອກໂດຍ ກອງເລຂາອາຊຽນ ໂດຍການສະໜັບສະໜູນຈາກໂຄງການໃນໄລຍະທີ 2. ໃນລະດັບຊາດ, MRLG ໄດ້ສຸມໃສ່ແກ້ໄຂບັນດາບຸລິມະສິດສະເພາະ ແລະ ສິ່ງທ້າທາຍຕ່າງໆທີ່ປະເຊີນພົບພໍ້ໂດຍຊຸມຊົນທ້ອງຖິ່ ສິ່ງນີ້ລວມມີການດໍາເນີນການຄົ້ນຄ້ວາ, ການສົ່ງເສີມການປະຕິຮູບທາງດ້ານກົດໝາຍ ແລະ ນະໂຍບາຍ, ແລະ ການພັດທະນາເຄື່ອງມືປະຕິບັດສໍາລັບການຮັບຮູ້ສິດການຄອບຄອງຕາມປະເພນີ. ຄວາມສະເໝີພາບລະຫວ່າງບົດບາດຍິງ-ຊາຍ ແລະ ການມີສ່ວນຮ່ວມຂອງຊຸມຊົນຍັງຄົງເປັນຈຸດສຸມຂອງແນວຄວາມຄິດລິເລີ່ມທັງໝົດ. ໃນປະເທດກໍາປູເຈຍ, MRLG ສຸມໃສ່ການປັບປຸງກົດໝາຍເຂດປ່າປ້ອງກັນ, ໃນຂະນະທີ່ຢູ່ໃນ ສປປ ລາວ, ຈຸດສຸມແມ່ນການຫັນປ່ຽນສິດການຄອບຄອງພື້ນທີ່ປ່າໄມ້ເປັນທາງການ. ໃນປະເທດມຽນມາ, ທ່າມກາງຄວາມຂັດແຍ້ງ ແລະ ຄວາມບໍ່ມີສະຖຽນລະພາບທາງດ້ານການເມືອງ, MRLG ສະໜັບສະໜູນສິດຄອບຄອງທີ່ດິນຂອງຊຸມຊົນທ້ອງຖິ່ນ ແລະ ການຈັດຕັ້ງປະຕິບັດຕາມປະເພນີ. ໂດຍຜ່ານການຈັດຕັ້ງປະຕິບັດທີ່ມີເປົ້າໝາຍເຫຼົ່ານີ້ໃນໄລຍະທີ 3, MRLG ມີເປົ້າໝາຍເພື່ອຮັບປະກັນສິດຄອບຄອງທີ່ດິນ ແລະ ປັບປຸງຊີວິດການເປັນຢູ່ຂອງຊາວກະສິກອນຂະໜາດນ້ອຍ ແລະ ຊຸມຊົນທ້ອງຖິ່ນໃນທົ່ວພາກພື້ນແມ່ນ້ຳຂອງ.
